Vwala te gen twa (3) papiyon. Youn te wouj. Youn te woz. Youn te jòn. Pi gran plezi frè ak sè sa yo se te benyen nan solèy la ak danse sou bèl flè nan jaden an. Yo pa te janm bouke paske yo te toujou gen kè kontan.
Yon jou, te gen yon gwo lapli. Zèl yo te mouye tranp. Tout kote yo te eseye kouri, lapli pi rèd.
Pandan y ap vole konsa, yo wè yon choublak.
Papiyon wouj la di :
« Gade choublak sa a menm koulè ak mwen. Kite m al mande li pou l louvri pòt li pou nou ka pare lapli a. »
Papiyon wouj la di :
« Bonjou Kòmè Choublak. Èske ou ka kite nou rantre lakay ou pou nou tann lapli a pase souple ? »
Choublak la reponn :
« Papiyon wouj la mèt antre paske li gen menm koulè ak mwen. Men papiyon woz la ak papiyon jòn nan, nou mèt rete deyò. »
Papiyon woz la di :
« Si frè ak sè mwen yo pa ka rantre lakay ou, ou mèt kite sa. M ap rete deyò a anba lapli a ak yo. »
Lapli a te tonbe pifò, epi ti papiyon yo t ap tranble tankou fèy bwa. Pandan y ap vole toujou, yo wè yon flèdizè ki gen menm koulè ak papiyon woz la.
Papiyon woz la di :
« Pouki nou pa al mande li pou nou pare anba li pito ? Li gen menm koulè ak mwen. »
Flèdizè a reponn :
« Papiyon woz la mèt antre paske li gen menm koulè ak mwen. Men lòt yo, n ap oblije rete deyò. »
Papiyon woz la di :
« Enben si frè mwen yo pa ka antre, an nou bay vag. M pito rete deyò ak yo. Mèsi anpil. »
Papiyon jòn nan di :
« Pouki nou pa al mande li pou nou pare anba li pito ? Koulè li jòn menm jan ak mwen. »
Flè solèy la reponn :
« Papiyon jòn nan mèt antre paske li gen menm koulè ak mwen. Men lòt yo, rete deyò. »
Papiyon jòn nan di :
« Enben si frè ak sè mwen yo pa ka antre, m pito rete deyò ak yo. Mèsi kanmenm. »
Lapli a te tèlman fò, ti papiyon yo te vlope youn ak lòt pou fè yon sèl. Dlo lapli a ak dlo nan je yo te anvayi tout kò yo. Yo pa te ka sipòte ankò.
Solèy la te dèyè yon nyaj l ap gade. Sa te fè li lapenn. Li te wè kijan ti papiyon yo te rete soude malgre gwo lapli ak van. Li pouse nyaj la pou chase lapli a.
Limyè li te klere tout jaden an. Li seche zèl papiyon yo. Li chofe kò yo. Yo te sispann kriye. Ti papiyon yo te pran plezi yo nan jaden an jiskaske solèy la te kouche.
